Griechische Kolonisation

Dr Begriff Griechischi Kolonisazioon bezäichnet d Gründig vo griechische Pflanzstedt (Apoikie) vor und in dr archaische Epoche vo dr griechische Antike, wo vom Festland und vo de Insle vo dr Egeeis usgange isch. Mit dere Kolonisazioon si vor allem im Küsteberiich vom Middelmeer und em Schwarze Meer die griechischi Sprooch, Kultur und Polis-Ornig verbräitet worde. Das isch im Wääsentlige in zwäi Faase bassiert, nämlig d Faase vo dr „Ionische Kolonisazioon“, wo im 11. und 10. Joorhundert v. d. Z. noch em Zämmebruch vo dr mykenische Palastkultur choo isch und vor allem die chläiasiatische Küsterüüm betroffe het, und d Faase vo dr „Groosse Kolonisazioon“ vom 8. bis ins 6. Joorhundert v. d. Z., wo dr griechisch Siidligsruum vo Spanie bis zum Kaukasus und vo Südrussland bis Egüpte erwiteret worde isch.^[1]

Die antiki griechischi Kolonisazioonsbeweegig isch en offnigs Forschigsfäld, wo sich im Fluss befindet dank ere intensive Usgrabigsdäätigkäit.^[2] D Wirkige, wo vo dr Kolonisierig usgange si, si vo ere historische Draagwiti, wo mä kuum cha überschetze. Si het nid nume d Völker in de kolonisierte Gebiet beiifluss, sondern au d Entwigglig uf em griechische Festland und het alli Hellene bewusst gmacht, ass si zämmenghööre. Vo doo isch u. a. d Bedütig cho wo zentrali Örter, wo in deere Zit ufchoo si, für e Kult und d Begegnig vo alle Grieche mitenand ghaa häi. Under dene stöön Delphi und Olympia uuse.

1. ↑ Hermann Bengtson, Griechische Geschichte. Von den Anfängen bis in die Römische Kaiserzeit. Sonderusgoob vo dr 5. Uflaag, Münche 1979, (1. Uflaag 1950) S. 47.
2. ↑ Wolfgang Schuller: Griechische Geschichte. 3. überarbäiteti und erwitereti Uflaag, Münche 1991, S. 106.